TAFAKARI: JUMANNE WIKI YA 2 YA MWAKA-I

JUMANNE WIKI YA 2 YA MWAKA-I

Somo: Ebr 6:10-20

Zab: 111:1-2, 4-5, 9, 10

Injili: Mk 2:23-28

Nukuu:

“Maana Mungu si dhalimu hata aisahau kazi yenu, na pendo lile mlilolidhihirisha kwa jina lake, kwa kuwa mmewahudumia watakatifu, na hata hivi sasa mngali mkiwahudumia,” Ebr 6:10

 “Na hivyo kwa kuvumilia akaipata ile ahadi,” Ebr 6:15

“Akawaambia, Sabato ilifanyika kwa ajili ya mwanadamu, si mwanadamu kwa ajili ya sabato,” Mk 2:27

“Basi Mwana wa Adamu ndiye Bwana wa sabato pia,” Mk 2:28

TAFAKARI: “Na hivyo kwa kuvumilia utaipata ile ahadi.”

Wapendwa wana wa Mungu, ni mang’amuzi yangu na bila shaka yako pia kwamba Mungu hutenda mambo makuu kwa watu ambao kadiri ya mtazamo wetu uliojijenga katika mila na desturi utushangaza kabisa.  Huyu ndiye Mungu kama asemavyo Mama Bikira Maria, “Amewaangusha wakuu katika viti vyao vya enzi; Na wanyonge amewakweza,” Lk 1:52. Mungu wetu aliye haki, upendo, huruma na wema kamwe hatendi na kutazama kama sisi wanadamu. Tatizo kubwa la mwanadamu huwa haoni vitu kama vilivyo, bali huviona vitu kama alivyo yeye. Ni kwa mantiki hii mtu husongwa na mila na desturi zilizomkuza katika maamuzi yake.

Mungu wetu hatazami kama sisi tutazamavyo katika hulka na ushabiki wetu. Mungu hufanya kadiri na ukamilifu wake. Nasi kama wanadamu tunaalikwa kila siku kuwa wakamilifu kama alivyo Mungu wetu. “Basi ninyi mtakuwa wakamilifu, kama Baba yenu wa mbinguni alivyo mkamilifu,” Mk 5:48. Ni vyema ufahamu uwepo wako hapa duniani. Ndugu yangu unanyesafiri nami katika tafakari hii, elewa kwamba upo hapa nduniani kupigana kufa na kupona juu ya cheo chako ambacho ni utakatifu wako. Mengine yote na fahari zake ni mbwembe tu. Huwezi kumwona Mungu kama si mtakatifu. Je, unajua hilo? Na katika vita hii, uvumilivu wako ndiyo mbivu yako kwa sababu, kwa kuvumilia utaipata ile ahadi, Ebr 6:15.

Ndugu yangu, maisha na malengo yetu wakati mwingine haviendani. Unayo tamani na kuyataka wakati mwingine hayafikiki. Ila tumaini la Mungu aliloweka juu yetu hawezi kulitelekeza. “Maana Mungu si dhalimu hata aisahau kazi yenu, na pendo lile mlilolidhihirisha kwa jina lake, kwa kuwa mmewahudumia watakatifu, na hata hivi sasa mngali mkiwahudumia,” Ebr 6:10. Hizi neema na baraka za Mungu anazotujalia zinatuwajibisha kufanya kila mtu kadiri ya hali na wito wake. Kile ulicho leo na sasa siyo kwa bahati mbaya. Wewe elewa ndiye mdomo, miguu, na mikono, ya Kristo Yesu pale kusipofikika. “Nasi twataka sana kila mmoja wenu aidhihirishe bidii ile ile, kwa utimilifu wa matumaini hata mwisho; ili msiwe wavivu, bali mkawe wafuasi wa hao wazirithio ahadi kwa imani na uvumilivu,” Ebr 6:11-12.

Furaha ya kweli ipo ndani yako na hakuna kitu kingine nje ya wewe kinachoweza kukupa furaha ya kweli kama hutotambua kweli hii ndani yako. Mengine yote unayotegemea kufanya kwa lengo la kukupatia furaha ni kujidanganya wewe mwenyewe kama hutoanza na wewe mwenyewe. Ndugu yangu, “Mungu, alipompa Ibrahimu ahadi, kwa sababu alikuwa hana mkubwa kuliko yeye mwenyewe wa kumwapa, aliapa kwa nafsi yake, akisema, Hakika yangu kubariki nitakubariki, na kuongeza nitakuongeza,” Ebr 6:13-14. Kumbe kabla ya kuyataka hayo ya nje ni vyema kujua stamina yako kiroho na kimwili. “Maana wanadamu huapa kwa yeye aliye mkuu kuliko wao; na kwao ukomo wa mashindano yote ya maneno ni kiapo, kwa kuyathibitisha,” Ebr 6:16. Je, wajua stamina yako? Tatizo lako na langu ni hili, “tumejiumbia taswira zisizo zetu. Tunaishi vivuli vya wengine.”

Somo letu hii la leo kutoka kwa Waebrania latutaka kuona “neno hilo Mungu, akitaka kuwaonyesha zaidi sana warithio ile ahadi, jinsi mashauri yake yasivyoweza kubadilika,” Ebr 6:17. Ikiwa maisha ni hatua, hivyo ishi yetu kila siku ni hatua kuelekea utimilifu ambao ndiyo Kristo katika yote. Na kwa mantiki hiyo, Mungu “alitia kiapo katikati; ili kwa vitu viwili visivyoweza kubadilika, ambavyo katika hivyo Mungu hawezi kusema uongo, tupate faraja iliyo imara, sisi tuliokimbilia kuyashika matumaini yale yawekwayo mbele yetu, tuliyo nayo kama nanga ya roho, yenye salama, yenye nguvu, yaingiayo hata mle mlimo ndani ya pazia, alimoingia Yesu kwa ajili yetu, mtangulizi wetu, amekuwa kuhani mkuu hata milele kwa mfano wa Melkizedeki,” Ebr 6:18-20. Huyu ndiye Mungu, na huu ndio upendo wa Mungu kwetu.

Leo katika Injili Yesu anatukumbusha lililo la muhimu. Ni kweli mila na desturi zetu zina umuhimu wake, ila sauti ya Mungu ni muhimu zaidi kwa sababu ndiyo hatma yetu. Wanafunzi wa Yesu wanakoselewa na kulaumiwa kwa kufanya lisilo sahihi siku ya sabato kadiri ya mapokeo ya kiyahudi. Yesu anawajibu, “Sabato ilifanyika kwa ajili ya mwanadamu, si mwanadamu kwa ajili ya sabato,” Mk 2:27. Utu wa mtu ni kitu cha kwanza kabisa kutazama zaidi ya mitazamo. Ndani ya mtu kuna chapa ya Mungu ndani yake. Mtu lazima aheshimiwe kama alivyo bila kuangalia nafasi na cheo chake katika jamii. Hivyo Kristo ndiye sababu ya yake yote kuyafanyayo. “ Basi Mwana wa Adamu ndiye Bwana wa sabato pia,” Mk 2:28. Kristo amekuja kuitakatifuza sheria na kuikamilisha. “Msidhani ya kuwa nalikuja kuitangua torati au manabii; la, sikuja kutangua, bali kutimiliza,” Mt 5:17. Binadamu na utu wake kwanza, mengine yafuate.

Tumsifu Yesu Kristo

“Maana Mungu si dhalimu hata aisahau kazi yenu, na pendo lile mlilolidhihirisha kwa jina lake, kwa kuwa mmewahudumia watakatifu, na hata hivi sasa mngali mkiwahudumia,” Ebr 6:10

Tusali: Ee Yesu na Kiongozi wetu, nijalie uvumilivu katika maisha yangu. Amina