TAFAKARI: JUMATANO WIKI YA 20 YA MWAKA-C

JUMATANO WIKI YA 20 YA MWAKA-C

Somo: Eze 34:1-11

Zab/Kit: 23:1-3a, 3b-4, 5, 6

Injili: Mt 20:1-16

Nukuu

^“Neno la Bwana likanijia, kusema, Mwanadamu, toa unabii juu ya wachungaji wa Israeli, toa unabii, uwaambie, naam, hao wachungaji, Bwana MUNGU asema hivi; Ole wao wachungaji wa Israeli, wanaojilisha wenyewe; je! Haiwapasi wachungaji kuwalisha kondoo?” Eze 34:1-2 

 ^“Wagonjwa hamkuwatia nguvu, wala hamkuwaponya wenye maradhi, wala hamkuwafunga waliovunjika, wala hamkuwarudisha waliofukuzwa, wala hamkuwatafuta waliopotea; bali kwa nguvu na kwa ukali mmewatawala,” Eze 34:4 

 ^“kwa sababu hiyo, enyi wachungaji, lisikieni neno la Bwana; Bwana MUNGU asema hivi; Tazama, mimi ni juu ya wachungaji; nami nitawataka kondoo zangu mikononi mwao, nami nitawaachisha hiyo kazi ya kuwalisha kondoo; nao wachungaji hawatajilisha wenyewe tena; nami nitawaokoa kondoo zangu vinywani mwao, wasiwe tena chakula chao,” Eze 34:9-10 

 ^“Kwa maana ufalme wa mbinguni umefanana na mtu mwenye nyumba aliyetoka alfajiri kwenda kuajiri wakulima awapeleke katika shamba lake la mizabibu,” Mt 20:1 

 ^“Kulipokuchwa, yule bwana wa shamba akamwambia msimamizi wake, Waite wakulima, uwalipe ujira wao, ukianzia wa mwisho hata wa kwanza,” Mt 20:8 

^“Rafiki, sikudhulumu; hukupatana nami kwa dinari? Chukua iliyo yako, uende zako; napenda kumpa huyu wa mwisho sawa na wewe,” Mt 20:13-14 

TAFAKARI: “Vivyo hivyo wa mwisho watakuwa wa kwanza, na wa kwanza watakuwa wa mwisho.”

Wapendwa wana wa Mungu, Mtakatifu Yohane Maria Viane alishawahi kusema katika maandishi yake kwamba, "acha eneo na sehemu yoyote bila Padre kwa miaka ishirini, matokeo yake watu wataanza kuabudu wanyama." Hakika Padre kwa Kanisa ni zawadi kubwa kuliko zawadi zote zitolewazo. Na hii ndiyo taswira ya Padre kama mchungaji Mwema na akisi la Yesu Kristo kama Mchungaji. Naye Mtakatifu Franscisco wa Assis anasema hivi juu ya Padre, "kama ningekutana na malaika pamoja na Padre, ningeweza kumsalimia kwanza Padre, kwani Malaika ni rafiki wa Mungu, na Padre ni Mhudumu wa Mungu." Kumbe Padre kama mchungaji utambulika kwa huduma ile aitowayo kama Kristo mwingine, "Alter Christus."

Nyakati za Nabii Ezekieli mambo hayakuwa hivyo kwa wale waliopewa wajibu huo kama wachungaji. Badala ya kuwaongoza watu katika kweli na haki, walichukua nafasi hiyo kujinufaisha na kuwapoteza kondoo waliokabidhiwa. Naye Mungu kupitia nabii wake Ezekieli anawapa ujumbe huu wale wachungaji walio kengeuka na kusema, ^“Mwanadamu, toa unabii juu ya wachungaji wa Israeli, toa unabii, uwaambie, naam, hao wachungaji, Bwana MUNGU asema hivi; Ole wao wachungaji wa Israeli, wanaojilisha wenyewe; je! Haiwapasi wachungaji kuwalisha kondoo?” Eze 34:1-2. Hawa ni wale wachungaji hata nyakati zetu walio tayari kuwakamua kondoo bila kuwalisha vizuri. Hawa ni wale wachungaji ambao hutanguliza mambo yao ya binafsi na fahari zao na kuwaacha kondoo wakiwa wamekondeana ilhali wao wakiwa wamenawiri.

Je, ni jambo la ajabu leo kuona mchungaji akiwa hana kitu kabisa na baada ya muda mfupi tu kuwa tajiri wa kupindukia ilhali kondoo wake wakigaagaa katika wimbi la umasikini? Mtume Paulo anatupa taswira halisi ya mchungaji na kusema, ^“Maana mmejua neema ya Bwana wetu Yesu Kristo, jinsi alivyokuwa maskini kwa ajili yenu, ingawa alikuwa tajiri, ili kwamba ninyi mpate kuwa matajiri kwa umaskini wake,” 2Kor 8:9. Badala yake, Mungu leo anatuambia wachungaji kuwa mmekula kondoo  ^“walionona, mnajivika manyoya, mnawachinja walionona; lakini hamwalishi kondoo,” Eze 34:3. Kazi kubwa ya mchungaji ni kuwaongoza wale anaowachunga katika kweli na haki, na matokeo yake hatakoswa chochote kwa kutimiza wajibu huo. Naye Yesu katika hili anasema, “ampokeaye nabii kwa kuwa ni nabii, atapata thawabu ya nabii; naye ampokeaye mwenye haki kwa kuwa ni mwenye haki, atapata thawabu ya mwenye haki,” Mt 10:41. Kumbe mbele za watu kama mchungaji yakupasa kuwa kile ukiwakilishacho kwa watu, na wapaswa kuishi hivyo. Katika hili Mtume Paulo anasema, “kazi ya mtu aliyoijenga juu yake ikikaa, atapata thawabu,” 1Kor 3:14.

Badala yake tukiyatanguliza ya ulimwengu huu na ubinafsi wetu, ndicho chanzo cha kuwapoteza kondoo tulikabidhiwa. Na haya ndiyo matokea yake, na malalamiko ya Mungu ndani yetu tuliopewa thamana hiyo; ^“wagonjwa hamkuwatia nguvu, wala hamkuwaponya wenye maradhi, wala hamkuwafunga waliovunjika, wala hamkuwarudisha waliofukuzwa, wala hamkuwatafuta waliopotea; bali kwa nguvu na kwa ukali mmewatawala,” Eze 34:4. Kati yetu wapo wachungaji wasiojitoa kwa chochote bila kupewa cha juu kwa kile ambacho ni wajibu wao kama wachungaji. Hakika hili ni sikitiko kubwa sana kwa Mungu. Kumbe wakati mwingine tusishangae kondoo wakitawanyika na kutafuta malisho kwenye nyumba za sala ambazo leo zinakuwa kama uyoga pembezoni mwa Makanisa yetu. Kondoo hawa huenda huko si kwa sababu mafundisho wayasikiayo huko ni sahihi, bali wayasemayo wachungaji huko waendako huyagusa majereha yao kimwili na kiroho. Hivyo kondoo hawa hutawanyika, ^“kwa sababu hapakuwa na mchungaji; wakawa chakula cha wanyama- mwitu, wakatawanyika,” Eze 34:5 

Ikiwa Mungu ndiye aliyekuhesabia haki hiyo ya kuwa mchungaji wa kundi lake, kamwe hatovumilia utendavyo ndivyo sivyo. Naye Mungu anasema, ^“kwa sababu hiyo, enyi wachungaji, lisikieni neno la Bwana; Bwana MUNGU asema hivi; Tazama, mimi ni juu ya wachungaji; nami nitawataka kondoo zangu mikononi mwao, nami nitawaachisha hiyo kazi ya kuwalisha kondoo; nao wachungaji hawatajilisha wenyewe tena; nami nitawaokoa kondoo zangu vinywani mwao, wasiwe tena chakula chao,” Eze 34:9-10. Ndugu yangu tunayesafiri sote katika tafakari hii, mafanikio yako bila Mungu hayana kesho. ^“Maana, Bwana MUNGU asema hivi; Tazama, mimi mwenyewe, naam, mimi, nitawatafuta kondoo zangu, na kuwaulizia,” Eze 34:11. Je, katika hatua hii ya Mungu unalo lako la kujivunia? Tumwogope Mungu na kuwa na hofu naye!

Wapendwa wana wa Mungu, kila mmoja wetu mbele ya Mungu ana mizania sawa licha ya utofauti wetu katika wito na karama tulizojaliwa na kuziishi. Kumbe kila mmoja wetu yampasa kuishi vyema kile alicho bila kujibakiza. Haijalishi ulianza jana, leo asubuhi, mchana au jioni, yaani, nyakati zile za mwisho wa uhai wako. Mbele ya Mungu kutangulia au kuchelewa hakuna nafasi sana zaidi ya kuishi kile ulichopaswa kuishi kadiri ya wito na karama zako. ^“Akatoka mnamo saa tatu, akaona wengine wamesimama sokoni wasiokuwa na kazi; na hao nao akawaambia, Enendeni nanyi katika shamba langu la mizabibu, na iliyo haki nitawapa. Wakaenda,” Mt 20:3-4. Ukarimu wa Mungu hauna kipimo katika mizania yetu ya kibinadamu. Hivyo,  ^“Akatoka tena mnamo saa sita na saa kenda, akafanya vile vile,” Mt 20:5. Ndugu yangu, upendo wa Mungu juu yako ni mkubwa sana. Mungu anachohitaji ni utayari wako tu wa kuelekea upendo wake. Na hivyo, ^“Hata kama saa kumi na moja akatoka, akakuta wengine wamesimama, akawaambia, Mbona mmesimama hapa mchana kutwa bila kazi?” Mt 20:6. Hata hawa ambao hawakuwa na matumaini tena katika siku ile, Mungu anakuwa matumaini yao. Nao ^“Wakamwambia, Kwa sababu hakuna mtu aliyetuajiri. Akawaambia, enendeni nanyi katika shamba la mizabibu,” Mt 20:7

Mwisho wa siku, yaani, maisha yetu hapa duniani tutapigwa na mshangao wa ukarimu huu wa Mungu kwa sababu mahesabu yetu siyo ya Mungu. Ukarimu wa Mungu uzidi mtazamo wetu katika utoaji haki. Kwa kupenda kwake Mungu hatoacha kutoa kwa wale wamwelekeao katika kweli na haki. Na ndivyo ilivyokuwa kwamba, ^“Kulipokuchwa, yule bwana wa shamba akamwambia msimamizi wake, Waite wakulima, uwalipe ujira wao, ukianzia wa mwisho hata wa kwanza,” Mt 20:8. Ujira wetu mbele ya Mungu ni mmoja tu licha ya utofauti wa stadi za maisha na karama tulizojaliwa naye. Ujira huu ni Utakatifu wako kwa kile ulichoitiwa na kukichuchumilia ambacho hakipimwi na wingi wa miaka wala masaa uishiyo hapa duniani. Kwa sababu,  ^“Hapana mfalme aokokaye kwa wingi wa uwezo, Wala shujaa haokoki kwa wingi wa nguvu,” Zab 33:16. Yote tuliyo nayo tumehesabiwa haki na Mungu mwenyewe. Ni katika mtazamo ule wa kujihesabiwa haki, ^“walipokuja wale wa saa kumi na moja, walipokea kila mtu dinari,” Mt 20:9. Na kinyume chake, na katika mtazamo wa kibinadamu wa kujihesabia haki ^“wale wa kwanza walipokuja, walidhani kwamba watapokea zaidi; na hao pia wakapokea kila mtu dinari,” Mt 20:10. Huyu ndiye Mungu aliye kweli, haki, na upendo. Na hutoa yote kadiri ya kile alicho, yaani, upendo usio na kipimo wala mizania ya kibinadamu. 

Pamoja na malalamiko ya watu hao kuona Mungu hakufanya iliyo haki, Mt 20:11-12, naye anamjibu mmoja wa mlalamikaji na kusema, ^“Rafiki, sikudhulumu; hukupatana nami kwa dinari? Chukua iliyo yako, uende zako; napenda kumpa huyu wa mwisho sawa na wewe,” Mt 20:13-14. Mimi na wewe ni nani hata kuhoji upendo wa Mungu? Naye Mungu anaamsha dhamira zetu zilizolala na kuzihoji, ^“Si halali yangu kutumia vilivyo vyangu kama nipendavyo? Au jicho lako limekuwa ovu kwa sababu ya mimi kuwa mwema?” Mt 20:15. Mbele ya Mungu hupaswi kuishi maisha mlinganisho zaidi ya kuishi kile ulicho na ulichoitiwa ambacho mwisho wa siku  na kwa kuishi kadiri ya mapenzi yake Mungu  ndipo palipo utakatifu wako kama ujira wako. Na moja ya mshangao mbele ya Mungu utakuwa huu, ^“wa mwisho watakuwa wa kwanza, na wa kwanza watakuwa wa mwisho,” Mt 20:16. Ndugu yangu ishi vyema wito wako na karama alizokupa Mungu si kwa ajili yako binafsi, bali kwa kufaidiana.

Tumsifu Yesu Kristo! 

“Rafiki, sikudhulumu; hukupatana nami kwa dinari? Chukua iliyo yako, uende zako; napenda kumpa huyu wa mwisho sawa na wewe,” Mt 20:13-14

Tusali:-Ee Yesu, tujalie neema za kuishi kila siku kile ulichotuita kuishi, na tuishi kwa uaminifu na bila kujibakiza. Amina