TAFAKARI: JUMATANO WIKI YA 33 YA MWAKA-B

JUMATANO WIKI YA 33 YA MWAKA-B

18/11/2015

Somo: 2Mak 7:1, 20-31

Zab: 17:1bcd, 5-6, 8b, 15

Injili: Lk 19:11-28

Nukuu:

 “Bali ni yeye Muumba ulimwengu, yeye aumbaye wanadamu na kukikusudia chanzo cha vitu vyote; naye kwa rehema zake atakurudishieni roho zenu na uzima wenu, kwa kuwa ninyi sasa mnajihesabu kuwa si kitu kwa ajili ya amri zake” 2Mak 7:23

“Usiogope mwuaji huyu; jionyeshe umestahilika sawasawa na ndugu zako. Kubali kufa kwako, ili kwa rehema ya Mungu nikupokee tena pamoja na ndugu zako,” 2 Mak 7:29

“Mimi siitii amri ya mfalme, bali naitii amri ya sheria waliyopewa baba zetu kwa Musa,” 2Mak 7:30

“Wewe, uliyebuni kila namna ya uovu juu ya Waebrania, hutaokoka kabisa katika mikono ya Mungu,” 2Mak 7:31

“Akamwambia, Vema, mtumwa mwema; kwa vile ulivyokuwa mwaminifu katika neno lililo dogo, uwe na mamlaka juu ya miji kumi,” Lk 19:17

^“Nawaambia, Kila aliye na kitu atapewa, bali yule asiye na kitu atanyang'anywa hata alicho nacho,” Lk 19:26

TAFAKARI: “Mungu tu ndiye wa kuogopwa.”

Wapendwa wana wa Mungu, mfalme Antioko alikuwa tishio katika utawala wake hasa pale alipojaribu kupora kwa nguvu dhamiri za watu wake kwa kuwataka wafanya anayoyataka yeye na kusaliti Imani, mila na desturi zao. Simulizi la Mama Mkabayo aliyekuwa na watoto saba ndani ya utawala huu dhalimu, anatoa ushuhuda wa kweli juu ya Imani yake. Kutoa ushuhuda juu ya Imani ni kuelewa kile unachokiamini. Yakupasa kuelewa unachoamini na kwa imani hiyo uongeza maarifa juu ya ufahamu wako.

Binadamu na fahari zake na mbwembwe zake zote hupita kama moshi. Fahari ya mwanadamu ni kwa kipindi kifupi sana. Mama wa familia hii anaonyesha mwanga mkubwa kwa kile anachokifahamu kuhusu Imani yake. Ukweli huu unamfanya asiogope kuusema na kuusimamia kweli hata katika hali ya hatari. Wakuheshimiwa na kuabudiwa ni Mungu kwa sababu, “ni yeye Muumba ulimwengu, yeye aumbaye wanadamu na kukikusudia chanzo cha vitu vyote; naye kwa rehema zake atakurudishieni roho zenu na uzima wenu, kwa kuwa ninyi sasa mnajihesabu kuwa si kitu kwa ajili ya amri zake” 2Mak 7:23. Usia huu anautoa kwa wana wake ambao walikataa katu katu kula nyamba ya nguruwe ambayo kadiri ya Imani yao ni haramu na najisi. Nguruwe hakuliwa kwa sababu, “amepasuliwa ukwato lakini hacheui, huyu ni najisi kwenu msile nyama zao, wala mizoga yao msiiguse,” Kumb 14:8.

Mama huyu anaposhawishiwa na mfalme amshawishi mtoto wake wa mwisho ili akubali masharti ya mfalme na kumwokoa katika kifo, anamwambia mtoto wake maneno ya hekima na ujasiri. “Usiogope mwuaji huyu; jionyeshe umestahilika sawasawa na ndugu zako. Kubali kufa kwako, ili kwa rehema ya Mungu nikupokee tena pamoja na ndugu zako,” 2 Mak 7:29. Mtoto umleavyo ndivyo akuavyo. Kijana huyu katika udogo wake anawashangaza wengi pale anapoupokea ukweli juu ya imani yake bila hofu. Naye anawaambia, “Mimi siitii amri ya mfalme, bali naitii amri ya sheria waliyopewa baba zetu kwa Musa,” 2Mak 7:30. Wangapi leo tunaujasiri wa kusimama katika imani ya kweli? Hata kama hilo halitoshi, wangapi leo tu majasiri kuidai haki yako iliyoporwa? Wengi wetu tumekuwa wa woga hata kushishwa kujua haki zetu, na hata pale tunapozijua haki zetu tunaingiwa na hofu kuzidai. Woga huu ndio  utumwa wetu.

Wapendwa wana wa Mungu, uovu kamwe huwezi kutawala daima na kwa muda wote. Wema wa Mungu ndiyo utakao tawala daima. Mara zote katika historia ya wokovu wa mwanadamu, Mungu aliweza kuwa sauti kwa wale wasio na sauti. Mungu anauwezo pia kulisimamisha jiwe likaongea badala yake na kufikisha ujumbe kwa wale wanaohodhi madaraka si kwa kuwasaidia waliowapa dhamana, bali kwa kujifaidisha wenyewe. Hivyo ujumbe wa mwisho kwa kijana huyu anautoa kwa watawala wote wanafikiri wanauwezo wa kuchukua nafasi ya Mungu. “Wewe, uliyebuni kila namna ya uovu juu ya Waebrania, hutaokoka kabisa katika mikono ya Mungu,” 2Mak 7:31. Hakika adhabu yao ni kubwa!

 Tunaposimama katika Imani ya kweli na hasa pale tunapokuwa na ufahamu wa kile tunachokiamini, ni Mungu tu wa kuogopwa. Bwana wetu Yesu Kristo anatuambia jambo hili kwa undani. Naye anasema, ^“Nami nawaambia ninyi rafiki zangu, msiwaogope hao wauuao mwili, kisha baada ya hayo hawana wawezalo kutenda zaidi. Lakini nitawaonya mtakayemwogopa; mwogopeni yule ambaye akiisha kumwua mtu ana uweza wa kumtupa katika Jehanum; naam, nawaambia, Mwogopeni huyo,” Lk 12:4-5. Hakuna kama Mungu wetu aliye hai.

Kila mmoja wetu kapewa uwezo wa kupambana na mazingira yoyote yale atakayokutana nayo. Uwezo huu siyo wa kuufungia sehemu fulani na kutokufanya chochote. Injili ya leo inafafanua jambo hili kwa mifano ya watu watu waliopewa fedha za biashara na mtu mmoja Kabaila. Aliyepewa kumi alizalisha nyingine kumi, aliyepewa tana alizalisha nyingine tano, na aliyepewa moja hakufanya chochote zaidi ya kulalamika. Naye anasema, “Kwa maana nilikuogopa kwa kuwa u mtu mgumu; waondoa usichoweka, wavuna usichopanda,” Lk 19:21. Mara nyingi huwa tunajihukumu wenyewe kwa kutokuviendeleza vipaji alivyotupa Mungu na kubaki kutamani vipaji vya wengine. Wapo pia wengine kati yetu ambao muda wao wote maishani ni kuyatafuta yale ambayo yapo nje yao, na mwisho wa siku wanabaki kuwa vivuli vya wengine na kukosa furaha ya kweli.

Kumbe leo Kristo anatuambia tuthamini aliyotupatia Mungu, na tuyaendeleze kwa sababu, “Kila aliye na kitu atapewa, bali yule asiye na kitu atanyang'anywa hata alicho nacho,” Lk 19:26. Usipo kithamini ulicho nacho na kukiendeleza kitachukuliwa na kupewa mwingine. Hatua ya kwanza ya kuthamini kile ulichonacho huanza kwa kuwa mwaminifu kwa yale madogo madogo ya kila siku na hasa kwa yale tunayopewa dhamana nayo. Watumwa wale waliofanya vizuri walipewa hakikisho la utendaji wao. “Akamwambia, Vema, mtumwa mwema; kwa vile ulivyokuwa mwaminifu katika neno lililo dogo, uwe na mamlaka juu ya miji kumi,” Lk 19:17. Je, wajua vipaji vyako na uwezo wako?

Tumsifu Yesu Kristo!

^“Basi ikiwa ninyi, mlio waovu, mnajua kuwapa watoto wenu vipawa vyema, je! Si zaidi sana Baba yenu aliye mbinguni atawapa mema wao wamwombao?” Mt 7:11