TAFAKARI: JUMATANO WIKI YA 24 YA MWAKA-B

JUMATANO WIKI YA 24 YA MWAKA-B

16/9/2015

Somo: 1Tim 3:14-16

Zab: 110:1-6

Injili: Lk 7:31-35

Nukuu:

^“Lakini nikikawia, upate kujua jinsi iwapasavyo watu kuenenda katika nyumba ya Mungu, iliyo kanisa la Mungu aliye hai, nguzo na msingi wa kweli,” 1Tim 3:15

“Mungu alidhihirishwa katika mwili, Akajulika kuwa na haki katika roho, Akaonekana na malaika, Akahubiriwa katika mataifa, Akaaminiwa katika ulimwengu, Akachukuliwa juu katika utukufu,” 1Tim 3:16b

^“Wamefanana na watoto walioketi sokoni na kuitana, wakisema, Tuliwapigia filimbi wala hamkucheza; tuliomboleza, wala hamkulia,” Lk 7:32

^“Mwana wa Adamu amekuja, anakula na kunywa; nanyi mwasema, Tazama, mlafi huyu, na mnywaji wa divai, rafiki wao watoza ushuru na wenye dhambi,” Lk 7:34

TAFAKARI: “Usiache kutenda Mema kwani ndicho tulichoitiwa kama wana wa Mungu.”

Wapendwa wana wa Mungu, kwa njia ya tafakari iliyo hai twaweza kukutana na Mungu aliye hai kadiri ya mazingira yetu, kazi zetu, na mtindo wa maisha tulioamua kuishi kwa mapenzi ya Mungu mwenyewe. Twauona upendo wa Mungu katika uumbaji wake ambayo ndiyo mazingira tunayoyaishi. Kila tuonacho kinafunua uzuri, upendo, wema, na malengo la Mungu kwa mwanadamu aliyemuumba kwa sura na mfano wake. Hapana shaka yoyote kwamba Mungu kayafanya kama yalivyo kwa upendo kwa sababu YEYE NI UPENDO.

Ndugu yangu unayeambatana nami katika tafakari hii, ni kweli kabisa tunakutana na upendo wa Mungu katika kazi zetu, uwe umeajiriwa au kujiajiri mwenyewe. Mahusiano yetu na kile tufanyacho, wale tunaowahudumia, na matokea ya huduma yetu kwa watu, ni tendo la upendo wa Mungu hasa pale lengo zima ya kuyafanya hayo yote halina msukumo  au uhusiano wa moja kwa moja na ubinafsi wetu. Je, ni dhambi kupata faida kwa kile tufanyacho? La, hasha! Faida yetu katika hili mara zote iwe kuwapata watu na siyo kuwapoteza. Kuwapata watu liwe lengo msingi la kile tukifanyacho. Mtaji wetu mkubwa hasa katika uinjilishaji ni watu. Mmisionari bila watu ni sawa na kupiga mashuti pasipo goli. Je, nitawapataje watu? Nawapata watu kwanza kabisa kwa kuwajali watu hao, kwa kuwahudumia ipasavyo, na mwisho kwa kuwasikiliza kuliko kweli, upendo na haki. Msukumo wa tendo hili usijengwa katika dhana ya “kudhaniana vibaya.” Ni vyema katika hili kuwe na vyombo rasmi vya mazungumzano. Vyombo hivi viwe na fursa ya kutuleta pamoja na kujadiliana katika pendo, kweli, na haki. Jambo hili likifanyika katika ukweli na uwazi huu hata kama nitapata faida haitakuwa dhambi kwani ni matokea ya furaha ya wote.

Wapendwa wana wa Mungu, uhai wa Kanisa leo lazima ujengwe katika mtazamo huo na misingi hiyo niliyoieleza hapo juu. Huku ndiko kuenenda katika nyumba ya Mungu kuliko hai, nguzo na msingi wa kweli wa Kanisa. Mtume Paulo hasiti kulisema jambo hili kwa Timotheo, kwamba, ^“inawapasavyo watu kuenenda katika nyumba ya Mungu, iliyo kanisa la Mungu aliye hai, nguzo na msingi wa kweli,” 1Tim 3:15. Biashara kubwa Kanisani ni kuuishi upendo wa Mungu aliye hai. Kama kuna mengine zaidi ya haya basi ni mbwembwe tu. Upendo wa Mungu aliye hai unajidhihirisha katika mwili wake, yaani Yesu Kristo, unajidhihirisha katika haki na roho, ulioonekana na malaika zake, upasao kuhubiriwa kwa watu na ulimwengu wote, na mwisho ndio utakao tupeleka katika utukufu wake mbinguni. Hii ndiyo kazi ya Kanisa kama sakramenti ya wokovu wetu. Hivyo, “Mungu alidhihirishwa katika mwili, Akajulika kuwa na haki katika roho, Akaonekana na malaika, Akahubiriwa katika mataifa, Akaaminiwa katika ulimwengu, Akachukuliwa juu katika utukufu,” 1Tim 3:16b. Kanisa kama wabatizwa na sakramenti ya wokovu, linachangamoto zake nyingi ili kufikia malengo haya tajwa hapo juu. Changamoto kubwa ni ubinafsi wa wana Kanisa wenyewe. Ni hatari sana tunapotanguliza nafsi zetu na matakwa yetu na kumwacha Kristo aliye dira ya maisha yetu na Imani yetu.

Ubinafsi huu unampa mshtuko mkubwa Bwana wetu Yesu Kristo na kujiuliza,  afananishe na kitu gani kizazi hiki? Yesu anatufananisa na kizazi kilichokufa gazi na chenye upofu wa kutokuona yaliyo makuu ya Mungu kwa wengine, na badala yake kujiona chenyewe na mahitaji yake binafsi. Na Yesu anasema, ^“wamefanana na watoto walioketi sokoni na kuitana, wakisema, Tuliwapigia filimbi wala hamkucheza; tuliomboleza, wala hamkulia,” Lk 7:32. Ndugu yangu, usipotoka nje ya matamanio yako kimwili na kiroho, bado hujauonja pendo, kweli, na haki ya Mungu. Badala yake utakuwa mtu wa majungu tu pasipo sababu ya msingi kwa sababu mizania yako ya kweli itakuwa mwono wako mwenyewe. Ni vigumu kwa hali hii kuona mema ya wenzako. Vile vile itakuwia vigumu kujirekebisha. Ndiyo maana katika hili yote yale aliyoyafanya Yohane Mbatizaji walimwona kama ana pepo hivi. Jicho la ubinafsi kamwe haliwezi kuona na kusadifu mema ya mwingine. Sana sana ni kuyabomoya na kuyaharibu ya wengine ili wewe uonekana hata kama ni chukizo kwa wale unaowafanyia hayo.

Yesu pia anapatwa na changamoto hiyo aliyoipata Yohane Mbatizaji. Wayahudi waliojawa jicho la ubinafsi hawayaoni mema na mazuri ya Yesu. Badala yake ni shutuma na upotoshaji wa wema na upendo wa Mungu. Yesu analitambua hili na kusema, ^“Mwana wa Adamu amekuja, anakula na kunywa; nanyi mwasema, Tazama, mlafi huyu, na mnywaji wa divai, rafiki wao watoza ushuru na wenye dhambi,” Lk 7:34. Je, hali hii inasema nini juu ya maisha na wito wako?

Kadiri ya mang’amuzi ya maisha ni kweli isiyopingika kwamba ukitenda wema lazima utasemwa vibaya, ukitenda vibaya na kuwa mbaya kwa kwetu vile vile utasemwa vibaya, usipotenda chochote utasema vibaya. Hivyo katika hali hii Kristo anatuambia tusiache kutenda mema kwa sababu ndicho tulichoitiwa na Mungu. ^“Basi, Mungu wa amani aliyemleta tena kutoka kwa wafu Mchungaji Mkuu wa kondoo, kwa damu ya agano la milele, yeye Bwana wetu Yesu, awafanye ninyi kuwa wakamilifu katika kila tendo jema, mpate kuyafanya mapenzi yake, naye akifanya ndani yetu lipendezalo mbele zake, kwa Yesu Kristo; utukufu una yeye milele na milele. Amina,” Ebr 13:20-21.

Tumsifu Yesu Kristo!

EE YESU TUFANYE MWANGA NA NURU PALE TULIPO KWA MATENDO YETU MEMA. AMINA