TAFAKARI: ALHAMISI WIKI YA 24 YA MWAKA-B

ALHAMISI WIKI YA 24 YA MWAKA-B

17/9/2015

Somo: 1Tim 4:12-16

Zab: 110:7-10

Injili: Lk 7:36-50

Nukuu:

^“Mtu awaye yote asiudharau ujana wako, bali uwe kielelezo kwao waaminio, katika usemi na mwenendo, na katika upendo na imani na usafi,” 1Tim 4:12

^“Basi, yule Farisayo aliyemwalika alipoona vile, alisema moyoni mwake, Mtu huyu kama angekuwa nabii, angemtambua mwanamke huyu amgusaye, ni nani, naye ni wa namna gani, ya kwamba ni mwenye dhambi,” Lk 7:39

^“Kwa ajili ya hayo nakuambia, Amesamehewa dhambi zake ambazo ni nyingi, kwa kuwa amependa sana; lakini asamehewaye kidogo, huyo hupenda kidogo,” Lk 7:47

^“Akamwambia yule mwanamke, Imani yako imekuokoa, enenda zako kwa amani,” Lk 7:50

TAFAKARI: “Sote twahitaji upendo, huruma, na msamaha wa Mungu.”

Wapendwa wana wa Mungu, hakuna hata mmoja wetu anayeishi kwa ajili yake mwenyewe. Kama jambo hili lina ukweli katika maisha na asili yetu, basi yupo aliye mkuu kuliko sisi na mweza wa yote. Huyu ndiye hakimu wa haki kwa sababu kutoka kweka twauonja upendo, huruma na msamaha. Tumeuonja na tunauonja upendo huo, huruma hiyo, na msamaha huo kwa kupitia neno aliyemwilishwa yaani mwanaye Yesu Kristo. Hivyo, “hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake.” Yoh 15:13. Kuuthamini ukweli huu na kuuishi kunatupelekea kuyatafakari mawaidha na wosia wa Mtume Paulo: ^“Mtu awaye yote asiudharau ujana wako, bali uwe kielelezo kwao waaminio, katika usemi na mwenendo, na katika upendo na imani na usafi,” 1Tim 4:12. Haya yanawezekana pale tu tunapofundisha kweli hiyo, tunapoishi vipaji vyetu ipasavyo, na mwisho tunapodumu katika hayo mawili daima. Ukweli wa haya yote ni kwamba, “hakuna mtu miongoni mwetu aishiye kwa nafsi yake, wala hakuna afaye kwa nafsi yake,” Rum 14:7. Hivyo fundisho hili na tendo hili linatufunza unyenyekevu.

Injili ya leo tunamuona Yesu anaalikwa nyumbani kwa Mfarisayo mmoja ale chakula. Katika tukio hilo; upendo, huruma, na msamaha wa Mungu unajidhihirisha. Upendo, huruma, na msamaha wa Mungu hautokani na mila na desturi zetu wanadamu, bali ni kweli iliyo ndani ya Mungu mwenyewe ambayo ina uhusiano wa karibu kabisa na wa moja kwa moja na namna tulivyoumbwa, yaani, ‘kwa sura na mfano wake,’ Mwa 1:27. Sheria zetu licha ya ukweli unaoufunua kadiri ya mazingira yetu na wakati mwingine katika mapungufu yake, siyo sababu ya upendo, huruma, na msamaha wa Mungu kwetu, “kwa sababu hakuna mwenye mwili atakayehesabiwa haki mbele zake kwa matendo ya sheria; kwa maana kutambua dhambi huja kwa njia ya sheria,” Rum 3:20.

Yesu anautambua udhaifu huu wa sheria za wanadamu, na hasa katika jamii yake ambayo waliachana na torati na kufuata tafsiri ya torati na masimulizi yake, yaani, TALMUD. ^“Basi, yule Farisayo aliyemwalika alipoona vile, alisema moyoni mwake, Mtu huyu kama angekuwa nabii, angemtambua mwanamke huyu amgusaye, ni nani, naye ni wa namna gani, ya kwamba ni mwenye dhambi,” Lk 7:39.

 Jambo la kushangaza zaidi wakati wa Yesu, Torati ile ambayo ndiyo ilikuwa mstakabali wa Taifa la wana wa Mungu-Waisraeli, ilikwisha chakachuliwa vya kutosha na hivyo Taifa hili lilikuwa linafuata Tafsiri yake tu kwa sehemu kubwa. Jambo muhimu sana la kujua ni kwamba kipindi cha Yesu Wayahudi na hasa mafarisayo na waandishi hawakuwa wanaifuata Torati kama iliyokuwa, ila tafsiri yake (maisha ya dini na matendo yake kupitia masimulizi) iliyojulikana kwa ujumla kama TALMUD. Talmud ilibeba mambo mawili: MIDRASH (tafsiri ya mambo mbalimbali toka Torati), na MISHNAH (marudio/waliyorudia au mafundisho)

Kwa mantiki hiyo hapo juu ya TALMUD, vitabu vile vitano vya Torati vingewezwa kuandikwa kwa kurasa 350 tu; wakati TALMUD ilichukuwa hadi vitabu 523; vilivyo rudufiwa (printed) katika mabando (volumes) 22. Haya ndiyo yanayonukuliwa na mafarisayo na waandishi kama mapokeo ya wazee. Sehemu nyingi za mafundisho ya Yesu anapinga jambo hili la kufuata mapokeo ambayo ni tafsiri kutoka Torati. Ni ukweli wa Mungu uliopotoshwa.

Wapendwa wana wa Mungu, Mungu wetu hana macho tuliyo nayo sisi ambayo yana kikomo na umbali fulani wa kuona. Macho ya Mungu, au kwa namna nyingine muono wa Mungu uvuka hata uwezo wetu wa kuona na matokeo yetu ya kufikiri. Hivyo Yesu anaurejesha uhai wa Mungu kwa maisha ya kweli na sababu ya kuumbwa huyu mwanadamu. Hivyo kwa tukio hili la mwanamke huyu mwenye dhambi nyumbani mwa Mfarisayo, Yesu anasema bila kupepesa macho yake, ^“kwa ajili ya hayo nakuambia, Amesamehewa dhambi zake ambazo ni nyingi, kwa kuwa amependa sana; lakini asamehewaye kidogo, huyo hupenda kidogo,” Lk 7:47. Licha ya udhaifu wake kama mwanadamu, mwanamke huyu akuacha kuonja upendo wa Mungu na kurudisha upendo huo kwa Yesu kadiri ya uwezo wake. Anafanya tendo hili kwa  kumdondoshea machozi miguu ya Yesu, na kuipangusa kwa nywele za kichwa chake, hakuacha kumbusu sana miguu ya Yesu, na kumpaka miguu ya Yesu marhamu. Ni ukweli kwamba, “hakuna mtu aliyemwona Mungu wakati wowote. Tukipenda, Mungu hukaa ndani yetu, na pendo lake limekamilika ndani yetu,” 1Yoh 4:12. Msukumo huu wa upendo haumzuii Yesu kumwambia mwanamke huyu kuwa, “Imani yako imekuokoa, enenda zako kwa amani,” Lk 7:50. Kila mmoja wetu anahesabiwa haki mbele za Mungu si kwa kile alicho, bali ni upendo, huruma, na msamaha wake Mungu mwenyewe. “Maana ni nani katika binadamu ayajuaye mambo ya binadamu ila roho ya roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu,” IKor 2:11.

Je, ndugu yangu unalo la kumficha Mungu? Basi kama kweli tunataka kuponywa kama mwanamke huyu yatupasa kujisalimisha kila siku mbele za Mungu. Tunafanya hivyo tukijua kwamba, “wala hakuna kiumbe kisichokuwa wazi mbele zake, lakini vitu vyote vi utupu na kufunuliwa machoni pake yeye aliye na mambo yetu,” Ebr 4:13. Hapo vipi ndugu yangu?

Tumsifu Yesu Kristo!

EE YESU HATUNA CHA KUKUFICHA. TUNAOMBA HURUMA NA MSAMAHA WAKO. AMINA